 |
الاجابة على الاسئلة المتكررة بخصوص شركة ريلمي في مصر
ريلمي شركة جديدة , خايف اشتريها , هي ليها صيانة ؟
ريلمي شركة تابعة لشركة اوبو , اسم اوبو موجود على الشاحن وعلى ظهر موبايلات ريلمي , وسمعة شركة اوبو في مصر حلوة جدا , وعموما لو على الصيانة فهتقدر تعملها في مراكز أوبو بدون أي مشاكل , المشكلة الوحيدة الي هتقابلك هي سعر اعادة البيع ف الاول , واعتقد ديه هتتحل مع الوقت , شوف دلوقتي هونر اعادة البيع بتاعتها عاملة ازاي , بقت زي هواوي وفي وقت قصير جدا .2- ايه موضوع الاسعار الي بتتغير والموبايل هينزل امتى ؟
في حاجه في التسويق اسمها ” Limited Time Offer ” يعني اما تبقا عارف ان الموبايل متاح لفترة قليلة جدا بسعر مع خصم , هتاخد قرار الشراء أسرع بنسبة كبيرة , والكلام ده هيساعد ريلمي في انها تحقق مبيعات ضخمة في وقت قليل , علشان كدا هي بتستخدم سياسة فلاش سيل او خصم كبير مرة كل اسبوع , هي معندهاش مشكلة توقف بيع طول الاسبوع وتبيع في ساعة واحدة عدد ضخم من المبيعات , ع الاقل في الاول . اعتقد ع اخر الشهر الموبايل هيبقا موجود في المحلات عادي , بسعر مش اقل من الي موجود اونلاين , ف من الاخر , لو انت عاجبك الموبايل اشتريه اونلاين من جوميا في الاوقات الي بينزل فيها . وبالنسبة للمواعيد موبايل Realme 2 Pro نسخة 128 جيجا نزلت اونلاين على موقع جوميا والكمية خلصت وهتنزل تاني قريب , وموبايل Realme C1 نزل اونلاين النهاردة على جوميا وشوية والكمية هتخلص وهينزل تاني بعد اسبوع زي الـ 2 برو نسخة 128 جيجا اما بالنسبة لموبايل ريلمي 2 برو نسخة 64 جيجا هتتأخر لحد أخر الشهر علشان لو نزلت هتاخد من مبيعات النسخة الـ 128 .3- ايه رأيك في ريلمي 2 برو , هل هو احسن موبايل في فئته ؟
احنا في موبيلكس مش بنحب نقول رأي من غير اي دليل , خدنا الموبايل حطناه جمب المنافسين بتوعه في مقارنات كتير باختصار , ريلمي 2 برو النسخة الـ 128 جيجا , افضل ما فيه الـ 8 جيجا رام مع معالج سناب دراجون 660 مع خامات داخلية محترمة من اوبو , بس مش أفضل كاميرا ولا أفضل بطارية ولا أفضل شحن سريع ولا حتى أفضل تصميم . اما النسخة الـ 64 جيجا منه فاحنا عملنا ترشيحات أفضل الموبايلات تحت 4000 جنية , كان في المركز الأول الريلمي 2 برو نسخة 64 , لان سعره ممتاز بالنسبة للمعالج الي فيه مش محتاجه كلام !4- اشتري ريلمي C1 ولا اوبو A3s ؟
السؤال ده بيفكرني بنزول Honor 8x وحيرة المستخدم بينه وبين النوفا 3i , وفي الاخر اليوزر فضل الهونر 8 اكس علشان البطارية وفرق السعر الاقل , ده نفس سيناريو الريلمي سي 1 والاوبو A3s تقريبا هما واحد مع اختلاف بسيطة في الكاميرا السيلفي , وفي الاخر الريلمي سي 1 فعليا ب 2100 جنية و Oppo A3s فعليا ب 2650 جنية , فرق 550 جنية فرق كبير في الفئة السعرية ديه يخليني اقولك اشتري الريلمي سي 1 و وفر فلوسك .5- هل موبايل ريلمي C1 افضل موبايل بسعر 2000 جنية ؟
لو قريت السؤال الي فات هتعرف ردي , الاوبو A3s من انجح الموبايلات الي بتبيع وسعره 2650 جنية , تخيل ان موبايلRealme C1 نفس مواصفات A3s بس ب 2100 جنية فاكيد الاجابة اه طبعا هو افضل موبايل بالسعر ده , التقصير الوحيد في الفئة السعرية ديه هو مستشعر البصمة الي موجود في منافسين كتير , بس في مقابل معالج سناب 450 الي مش موجود غير في الموبايل ده بالسعر ده والبطارية العملاقة الي هتقعد معاك يومين .
6- بالنسبة لموبايل ريلمي 2 و ريلمي U1 هينزلوا امتى ؟
موبايل ريلمي 2 العادي مش هينزل مصر للأسف , وبالنسبة لموبايل U1 فموقفه لسه متحددش هينزل مصر ولا لأ , واول ما يحصل اي تحديثات هنبلغكم على الويب سايت وعلى صفحة موبيلكس على الفيس بوك وتويتر فورا .
7- تتوقع نجاح ريلمي في مصر ؟
من الأخر ريلمي C1 هيبيع كتير جدا جدا , والريلمي 2 برو نسخة 64 جيجا لما تنزل اخر الشهر هتبيع اكتر واكتر , والنسخة الـ 128 جيجا منه موقفها صعب مع المنافسين بس ذكاء فريق تسويق ريلمي هنا ممكن يقلب الموازين !متنساش تعمل شير على الفيس بوك وتويتر علشان تفيد اصحابك الي بيفكروا يشتروا موبايلات ريلمي
Tags:
أسألة واجوبه